Gesi Asili Futi za Ujazo Trioni 20.97 Zapatikana Mashariki mwa Mkoa wa Lindi.

DODOMA JUMAMOSI 16.06.2012

Kampuni lililofanya Utafiti wa Gesi

 SERIKALI imesema kuwa utafiti uliofanywa na makampuni mawili ya toka mataifa ya nje ya Statoil ya Norway na Exxon Mobil ya Marekani  yanayohusika na msuala ya madini yamegundua kuwepo kwa gesi asili yenye futi za ujazo Trioni 20.97 Mashariki mwa Mkoa wa Lindi nchini Tanzania.

Taarifa hiyo imetolewa (leo Jumamosi 16.06.2012) na Waziri wa Nishati na Madini, Profesa Sospeter Muhongo wakati  akiongea na waandishi wa habari juu ya ugunduzi wa gesi asilia katika mwambao wa Mikoa ya Mtwara na Lindi.

Profesa Muhongo amesema kwa kipindi cha miaka mitatu iliyopita kumekuwepo  kasi kubwa ya utafutaji wa mafuta na gesi asili hapa nchini.

Amesema kuwa utafiti huo umejikita zaidi kwenye bahari ya Hindi kwenye maji ya kina kirefu,kiasi cha gesi iliyogundulika katika kina cha maji marefu inafikia takribani futi za ujazo trioni 20.97 ikiwa imejumuisha kisima kilichogunduliwa wiki hii cha Lavani.

Waziri huyo alizitaja Kampuni zilizohusika na utafiti wa gesi asili kuwa ni Kampuni ya Statoil ya Norway kwa kushirikiana na Kampuni ya Exxon Mobil ya Marekani zimegundua na kuthibitisha kuwepo kwa gesi asili yenye futi za ujazo 20.97 katika kisima cha Lavana katika kitalu Na.2 Mashariki mwa Lindi.

Aidha alisema kisima kilichochimbwa Songo Songo Kisiwani na kukamilika Mei mwaka huu kimegunduliwa kuwa na uwezo wa kuzalisha futi za ujazo milioni 60 kwa siku.

Pwani ya Lindi na Mtwara ambako Gesi imepatikana

Alisema kuwa visima nane vilivyochimbwa kwenye bahari ya kina kirefu,visima saba vimegunduliwa kuwa na gesi asili na kisima kimoja (Papa- 1)kinaendelea kuchimbwa kwenye kitalu namba tatu.

Hata hivyo alisema pamoja na kuwa utafiti wa gesi asili umeonyesha kuwa na gesi nyingi lakini utafiti wa mafuta na gesi kwenye bahari ya kina kirefu unagharimu fedha nyingi, alieleza kuwa kisima kimoja takribani Dola za Marekani milioni 100 hadi 150 baada ya gharama za kukusanya takwimu za mitetemo.

Alisema kutokana na upatikanaji wa gesi asilia ya kutosha itawwezesha serikali kuwa na uhakika wa matumizi ya nisshati ya umeme na kuepukana na matumizi ya kuni na mkaa.

“Baada ya mika mitatu ijayo gesi asilia itaweza kutumiwa na watanzania wengi ikiwani ni pamoja na watumiaji wa majumbani na kuepukana na matumizi ya mkaa na kuni”alisema Profesa Muhongo.